Miércoles epu masri yom kiñe antü, febrero küyen mo, witrampüsramngi Ñuke Süngun tañi Antü tañi inkayafiel kishu ñi süngun fill ke moll’fünche mülelu monkoll mapu mo. Famechi ayüngi ñi pengelngea chumuechi kiñeke süngun petu mintsenakümngekay, chumuechi ka petu ñami kiñeke süngun. Fütawillimapu mo ayülayen ñamngea kishu in tse süngun, feymo amolüyen kiñe mütrüm tain inkayafiel tain mapunche süngun. Küme all’küñmangi may tain mütrüm.
Tain tse süngun fali. Soy nagmo ta mülelay winka süngun mo, feymo müli in inkayafiel ta ti, chew srume ta müleliyen. Feytichi srakisuam inayen ta inchen Fütawillimapu.org mo, femuechi mütrümfiyen tain pu che, kishu ñi nentualu engün kiñe nütram, tse süngun mo, tain pengeluwam chumuechi nütramkakiyen pu mapunche Fütawillimapu mo. «Ñamlayay tain süngun Fütawillimapu mo» üytufiyen feytachi küsow.
Küme llowngi tain mütrüm. Tain pu che akuleleyno kishu ñi nütram video mo. Ngüllümfiyen fill’ ke nütram, feymo tripay küla troy, küla video tamün askintuafiel ka all’kütuyafiel:
Kash küme tripay tain mütrüm.
Mañumafiyen tain pu che konkülepayl’u feytachi küsow mo:
- Chausrakawin Pangi (@leondelchaurakawin), Santiago.
- Verónica Córdova, Quilpué.
- Joseph Vivar Jaramillo, Currimahuida, San Pablo.
- Carolina Sandoval, Quilacahuín, San Pablo.
- Sara Aucapan, Semilloteca Huilliche, La Unión.
- César Pérez, Malal Kawello (Pulotre), San Juan de la Costa.
- Patricia León, Puyehue.
- Salvador Rumian, Osorno.
- Tercer año básico, Escuela Carlos Condell, Osorno.
- Hectolia Nenen Cárcamo, Estero Chacao, Chiloé.
- Esteban Fuentes Inayado, Huacahuincul, San Pablo.
- Cristian García Quintul, Fresia.
- Luis Salas Pinol, Popoen, San Juan de la Costa
- Viviana Lemuy Catrilef, Pualwe, San Juan de la Costa.
¡Küme mongen niepe engün!
Tain pu kuyfi ke tse künosrüpueyno tain tse süngun. Kash kutrankangejuy ti engün, kash tokitungejuy ti engün pu winka chillkatuwe. Epe l’angümüñmangi tain süngun, pu l’amuen, pu peñi, feymo müli in yafüluwüya tain witrapüsramtuya tain tse süngun fill’ püle, müli in trükatuyafiel tain el’eletew pu tremche, pu fücha ke mongen.
Wechulam feytachi chillka, nentukünoayen kiñe ngül’am: sreypulngele tain süngun ka mapunche süngun mo, muti süngun mülepay. Feymo, kishu tain mapu mo ka kishu tain pu che mo müli in kintuyafiel kuyfi che in süngukejol. Famechi falintükusrüpuayen tain mapunchengen Fütawillimapu mo.
Afi may feytachi chillka.
Fütawillimapu
@Wesrkin
@futawillimapu
Dejar una contestacion